D’Déiere vum Milleschhaff an England hunn es genuch a wëllen endlech selwer iwwert hiren Haff regéieren. Si erhiewe sech géint d’mënschlech Ënnerdréckung a striewen no enger Welt, an där jidderee gläich ass. Mee séier stellt sech eraus, dass gläich net ëmmer gläich ass ... D’Geschicht vum Déierenhaff ass eng allegoresch Fabel, déi beschreift, wéi séier d‘Visioun vun enger besserer Welt, duerch d’Verschleierung vun der Realitéit, duerch Propaganda an de Gebrauch vun Terror zerstéiert gëtt. Dëse Klassiker vum George Orwell weist eis nach haut op d’Gefor vum bestiechenden Effekt vu Muecht hin, a wéi séier eng Revolutioun riskéiert an eng Diktatur ëmzeschloen.