De Jean-Louis Schlesser ass den 22. Juli 1947 zu Lëtzebuerg gebuer. Hien huet an der Kommunikatioun, der Publicitéit an am Verlagswiese geschafft, ënner anerem als Member vum Direktiounscomité vun Editpress an als Responsabele fir d'Lëtzebuerger Aktivitéite vum Groupe Rossel. Parallel dozou huet hie reegelméisseg Artikelen iwwer gesellschaftlech a sozioekonomesch Theme publizéiert, ënner anerem am Tageblatt an am Le Jeudi. Haut schreift hie fir kulturissimo.

Als Schrëftsteller huet hien den dystopesche Roman La troisième crise, d'Theaterstéck Table rase, d'Familljechronik Ënner Bridder (2024) an de Roman noir Jeux d'Ombres (2025) verfaasst. Als Dréibuchauteur huet hien ënner anerem un de Filmer Le Club des chômeurs, La Revanche an Deep Frozen vum Andy Bausch souwéi Réfractaire vum Nicolas Steil matgeschafft. Am Beräich vun der Bande dessinée huet hien zesumme mam Zeechner Marc Angel De Jas (2015), De Jas kënnt zréck (2016) a La Mauvaise heure (2022) realiséiert.

De Marc Angel ass 1960 zu Dikrech gebuer an huet sech an den 1990er-Joren en Numm als Kënschtler an Illustrateur gemaach. Am Ufank huet hie virun allem Optragsaarbechten ausgefouert, fir sech no an no ëmmer méi mat der Bande dessinée an dem grafesche Roman ze befaassen.

Seng dräibänneg Serie Deemols, déi tëscht 1997 an 2003 erauskoum, huet hir fest Plaz an der Geschicht vun der lëtzebuerger Bande dessinée. Aus der Zesummenaabecht mam Zeenarist Jean-Louis Schlesser entstoungen De Jas (2015), De Jas kënnt zréck (2017, Eegeverlag, däitsch Versioun: Weeerd Verlag) an La Mauvaise heure (2022, Editions Mosquito). Zesumme mam Schrëftsteller Samuel Hamen huet hien Zeeechen realiséiert, dat 2020 mam Lëtzebuerger Buchpräis ausgezeechent gouf. Fir seng neiste Wierker Här a Meeschter (2024, Op der Lay) an Ongeschriwwe Gesetzer (2025, FGIL) huet hie selwer den Zenario geschriwwen.

2022 entstoung déi éischt Zesummenaarbecht tëscht dem Marc Angel an dem Auteur an Historiker Charel Meder: De grafesche Roman Schortgen beschreift d’Liewe vun dem éischten Aarbechter, deen an d’Chamber gewielt gouf. Den Album gouf zu Lëtzebuerg e grousse Succès a steet op der Lëscht vun de recommandéierte Bicher vum Educatiounsministère.